ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ನಲ್ಲಿ ದಾಖಲೆಯ ಶತಕ ಸಿಡಿಸಿದ ಸೂರ್ಯ!

21-11-22 01:04 pm       Source: Vijayakarnataka   ಕ್ರೀಡೆ

ಟಿ20 ವಿಶ್ವಕಪ್‌ ವೈಫಲ್ಯದ ಬಳಿಕ ಇದೀಗ ನ್ಯೂಜಿಲೆಂಡ್‌ ಪ್ರವಾಸದಲ್ಲಿರುವ ಟೀಮ್ ಇಂಡಿಯಾ ಪರ ಸ್ಟಾರ್‌ ಬ್ಯಾಟರ್‌ ಸೂರ್ಯಕುಮಾರ್‌.

ಟೀಮ್ ಇಂಡಿಯಾ ಸ್ಟಾರ್‌ ಬ್ಯಾಟರ್‌ ಸೂರ್ಯಕುಮಾರ್‌ ಯಾದವ್‌ ತಮ್ಮ ಶ್ರೇಷ್ಠ ಲಯದಲ್ಲಿ ಮುಂದುವರಿದಿದ್ದಾರೆ. 2022ರ ಸಾಲಿನಲ್ಲಿ ರನ್‌ ಹೊಳೆಯನ್ನೇ ಹರಿಸಿರುವ ಸೂರ್ಯಕುಮಾರ್‌ ಯಾದವ್‌, ಇಲ್ಲಿನ ಬೇ ಓವಲ್‌ ಕ್ರೀಡಾಂಗಣದಲ್ಲಿ ಭಾನುವಾರ ನಡೆದ ನ್ಯೂಜಿಲೆಂಡ್‌ ವಿರುದ್ಧದ ಟಿ20 ಕ್ರಿಕೆಟ್‌ ಸರಣಿಯ ಎರಡನೇ ಪಂದ್ಯದಲ್ಲಿ ಮಿಂಚಿನ ಶತಕ ಬಾರಿಸಿದ್ದಾರೆ.

2022ರ ಸಾಲಿನಲ್ಲಿ ಅತಿ ಹೆಚ್ಚು ಟಿ20-ಐ ರನ್‌ ಗಳಿಸಿದ ಬ್ಯಾಟರ್‌ ಆಗಿರುವ ಸೂರ್ಯಕುಮಾರ್‌ ಯಾದವ್‌, ಕೇವಲ 51 ಎಸೆತಗಳಲ್ಲಿ ಅಜೇಯ 111 ರನ್‌ ಸಿಡಿಸುವ ಮೂಲಕ ಟಾಸ್ ಸೋತು ಮೊದಲು ಬ್ಯಾಟ್‌ ಮಾಡಿದ್ದ ಭಾರತ ತಂಡಕ್ಕೆ 20 ಓವರ್‌ಗಳಲ್ಲಿ 191 ರನ್‌ಗಳ ಬೃಹತ್‌ ಮೊತ್ತ ತಂದುಕೊಟ್ಟರು. ಅವರ ಸ್ಪೋಟಕ ಇನಿಂಗ್ಸ್‌ನಲ್ಲಿ 11 ಫೋರ್‌ ಮತ್ತು 7 ಸಿಕ್ಸರ್‌ಗಳು ಮೂಡಿಬಂದವು.

ಇದೇ ವರ್ಷ ಜುಲೈನಲ್ಲಿ ಇಂಗ್ಲೆಂಡ್‌ ಎದುರು 119 ರನ್‌ ಸಿಡಿಸಿ ತಮ್ಮ ಚೊಚ್ಚಲ ಟಿ20-ಐ ಶತಕ ಬಾರಿಸಿದ್ದ ಸೂರ್ಯಕುಮಾರ್ ಯಾದವ್‌, ಇದೀಗ ಎರಡನೇ ಶತಕ ತಮ್ಮ ಖಾತೆಗೆ ಸೇರಿಸಿಕೊಳ್ಳುವ ಮೂಲಕ ಹಲವು ದಾಖಲೆಗಳನ್ನು ಬರೆದಿದ್ದಾರೆ. ಒಂದೇ ವರ್ಷದಲ್ಲಿ ಭಾರತದ ಪರ ಎರಡು ಟಿ20-ಐ ಶತಕ ಬಾರಿಸಿದ ಎರಡನೇ ಬ್ಯಾಟ್ಸ್‌ಮನ್‌ ಎನಿಸಿದ್ದಾರೆ. ಇದಕ್ಕೂ ಮುನ್ನ ರೋಹಿತ್‌ ಶರ್ಮಾ ಈ ಸಾಧನೆ ಮೆರೆದಿದ್ದರು.

ಈ ಶತಕದೊಂದಿಗೆ 2022ರಲ್ಲಿ ತಮ್ಮ ಒಟ್ಟು ಟಿ20-ಐ ರನ್‌ಗಳ ಗಳಿಕೆಯನ್ನು 1151ಕ್ಕೆ ವಿಸ್ತರಿಸಿಕೊಂಡಿದ್ದಾರೆ. 30 ಪಂದ್ಯಗಳಲ್ಲಿ ಈ ಸಾಧನೆ ಮೆರೆದಿರುವ ಸೂರ್ಯ, ವರ್ಷವೊಂದರಲ್ಲಿ ಅತಿ ಹೆಚ್ಚು ಟಿ20-ಐ ರನ್‌ಗಳಿಸಿದ ಬ್ಯಾಟರ್‌ ಆಗಿ ಪಾಕಿಸ್ತಾನದ ಮೊಹಮ್ಮದ್‌ ರಿಝ್ವಾನ್‌ ಅವರ ದಾಖಲೆಯನ್ನು ಮುರಿಯಲು ಇನ್ನು 177 ರನ್‌ಗಳನ್ನು ಗಳಿಸುವ ಅಗತ್ಯವಿದೆ. ಇನ್ನು 2022ರಲ್ಲಿ ಬರೋಬ್ಬರಿ 67 ಟಿ20-ಐ ಸಿಕ್ಸರ್‌ ಸಿಡಿಸಿದ ವಿಶ್ವ ದಾಖಲೆಯೂ ಸೂರ್ಯ ಹೆಸರಲ್ಲಿದೆ.

ಟಿ20-ಐ ಕ್ರಿಕೆಟ್‌ನಲ್ಲಿ ಶತಕ ಬಾರಿಸಿದ ಭಾರತೀಯರು
04 - ರೋಹಿತ್‌ ಶರ್ಮಾ
02* - ಸೂರ್ಯಕುಮಾರ್‌ ಯಾದವ್‌
02 - ಕೆ.ಎಲ್‌ ರಾಹುಲ್‌
01 - ವಿರಾಟ್‌ ಕೊಹ್ಲಿ
01 - ಸುರೇಶ್‌ ರೈನಾ
01 - ದೀಪಕ್‌ ಹೂಡ

ವರ್ಷ ಒಂದರಲ್ಲಿ ಒಂದಕ್ಕೂ ಹೆಚ್ಚು ಟಿ20-ಐ ಶತಕ ಬಾರಿಸಿದವರು
ರೋಹಿತ್‌ ಶರ್ಮಾ - 02
ಸೂರ್ಯಕುಮಾರ್‌ ಯಾದವ್‌ - 02

ಭಾರತದ ಪರ ಟಿ20-ಐ ಕ್ರಿಕೆಟ್‌ನಲ್ಲಿ ವೈಯಕ್ತಿಕ ಗರಿಷ್ಠ ಸ್ಕೋರ್‌
122*(61) - ವಿರಾಟ್‌ ಕೊಹ್ಲಿ (ಭಾರತ vs ಅಫಘಾನಿಸ್ತಾನ), ದುಬೈ 2022
118(43) - ರೋಹಿತ್‌ ಶರ್ಮಾ (ಭಾರತ vs ಶ್ರೀಲಂಕಾ), ಇಂದೋರ್ 2017
117(55) - ಸೂರ್ಯಕುಮಾರ್‌ ಯಾದವ್‌ (ಭಾರತ vs ಇಂಗ್ಲೆಂಡ್‌), ನಾಟಿಂಗ್‌ಹ್ಯಾಮ್‌ 2022
111*(51) - ಸೂರ್ಯಕುಮಾರ್‌ ಯಾದವ್‌ (ಭಾರತ vs ನ್ಯೂಜಿಲೆಂಡ್‌),ಮೌಂಟ್‌ ಮೌಂಗಾನುಯ್‌ 2022
111*(61) - ರೋಹಿತ್‌ ಶರ್ಮಾ (ಭಾರತ vs ವೆಸ್ಟ್‌ ಇಂಡೀಸ್‌), ಲಖನೌ 2018

Ind Vs Nz Suryakumar Yadav Smashes Record-Breaking Second T20 International Hundred.