ಮಂಗಳೂರು, ನ.29: ಕೆಲವೊಮ್ಮೆ ಕಣ್ಣ ಮುಂದೆ ನಡೆಯಬಾರದ್ದು ನಡೆದುಬಿಟ್ಟರೂ ನಂಗೇನು ಎಂತಲೇ ಆ ಘಟನೆಗೂ ತನಗೂ ಸಂಬಂಧವೇ ಇಲ್ಲ ಎಂದು ಜನ ದೂರ ನಿಲ್ಲುತ್ತಾರೆ. ಮಂಗಳೂರು ಹೊರವಲಯದ ಮೂಡುಶೆಡ್ಡೆ ಗ್ರಾಮ ಪಂಚಾಯತ್ ಕಚೇರಿ ಎದುರಲ್ಲಿ ರಾಕ್ಷಿಸಿ ಪುತ್ರಿಯೊಬ್ಬಳು ತನ್ನ ತಾಯಿಯನ್ನು ನೆಲಕ್ಕೆ ದೂಡಿ ಚಪ್ಪಲಿಯಲ್ಲಿ ಹಲ್ಲೆಗೈದ ವಿಡಿಯೋ ವೈರಲ್ ಆಗಿದ್ದು ಸ್ಥಳದಲ್ಲಿದ್ದವರು ನೋಡುತ್ತ ನಿಂತಿದ್ದು ಮನುಷ್ಯ ತನ್ನ ಮಾನವೀಯ ಗುಣವನ್ನೇ ಮರೆಯುತ್ತಿದ್ದಾನೆಯೇ ಎನ್ನುವ ಪ್ರಶ್ನೆ ಮೂಡಿಸಿದೆ.

ವಯಸ್ಸಾದ ಜೀವ ಅನ್ನೋದನ್ನೂ ನೋಡದ ಪಾಪಿ ಮಗಳು, ಹೆತ್ತ ತಾಯಿಗೆ ಹಿಗ್ಗಾಮುಗ್ಗಾ ಥಳಿಸುತ್ತಿದ್ದರೂ ಅಲ್ಲಿದ್ದ ಜನರು ತಮಗ್ಯಾಕೆ ಉಸಾಬರಿ ಅನ್ನೋ ರೀತಿ ವರ್ತಿಸಿದ್ದು ಜನರ ತೀವ್ರ ಟೀಕೆಗೆ ಗುರಿಯಾಗಿದೆ. ಒಬ್ಬಾತ ವಿಡಿಯೋ ಮಾಡುತ್ತ ಕೂತರೆ, ಇನ್ನಿಬ್ಬರು ಮಹಿಳೆಯರು ಮತ್ತೊಬ್ಬ ಪುರುಷನೂ ಅವರನ್ನು ನೋಡುತ್ತ ನಿಂತಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ವೈರಲ್ ಆಗಿದ್ದು ನೆಟ್ಟಿಗರು ತೀವ್ರ ರೀತಿ ಅಲ್ಲಿನ ಜನರು ತಮಗೇನೂ ಅನಿಸಿಯೇ ಇಲ್ಲ ಎನ್ನುವಂತೆ ನಿಂತಿದ್ದನ್ನು ಪ್ರಶ್ನೆ ಮಾಡಿದ್ದಾರೆ. 

ಮೂರು ದಿನಗಳ ಹಿಂದೆ ಮೂಡುಶೆಡ್ಡೆ ಗ್ರಾಪಂ ಕಚೇರಿಯ ಮುಂಭಾಗದಲ್ಲಿ ಘಟನೆ ನಡೆದಿದ್ದು, ತನ್ನ ಮೇಲೆ ಪ್ರತಿ ಬಾರಿ ದೂರು ಕೊಡಲು ಬರುತ್ತಿದ್ದಾಳೆಂದು ತಾಯಿ ಮೇಲೆ ಮಗಳು ಏರಿ ಹೋಗಿದ್ದಾಳೆ. ವೃದ್ಧ ತಾಯಿಯನ್ನು ಜಗಲಿಯಿಂದ ನೇರವಾಗಿ ತಳ್ಳಿದ್ದು ಆಕೆ ಹತ್ತಡಿ ದೂರಕ್ಕೆ ಹೋಗಿ ಬೀಳುತ್ತಾಳೆ. ಆನಂತರ, ಆಕೆಯದ್ದೇ ಚಪ್ಪಲಿ ತೆಗೆದು ನೆಲಕ್ಕೆ ಬಿದ್ದವಳ ಮೇಲೆಯೂ ಯರ್ರಾಬಿರ್ರಿ ಹೊಡೆದಿದ್ದಾಳೆ. ಇದನ್ನು ಅಲ್ಲಿದ್ದವರು ಯಾರೋ ವಿಡಿಯೋ ಮಾಡಿದ್ದು ಎರಡು ದಿನಗಳ ನಂತರ ವೈರಲ್ ಆಗಿದೆ.

ತಾಯಿ-ಮಗಳಿಬ್ಬರೂ ಉತ್ತರ ಕರ್ನಾಟಕವರಾಗಿದ್ದು, ಸ್ಥಳೀಯರು ಇವರ ಗೋಳಾಟ ಇದ್ದಿದ್ದೇ ಎನ್ನುವ ರೀತಿ ನಿರ್ಲಕ್ಷ್ಯ ತೋರಿದ್ದಾರೆ. ಆದರೆ ಸಾರ್ವಜನಿಕ ಪ್ರದೇಶದಲ್ಲಿ ತಾಯಿ- ಮಗಳಿಬ್ಬರು ಕಿತ್ತಾಡುತ್ತಿದ್ದರೆ ಅಲ್ಲಿದ್ದ ಜನರು ತಮಗೇನೂ ಅನಿಸಿಯೇ ಇಲ್ಲ ಎನ್ನುವಂತೆ ಸುಮ್ಮನಿದ್ದಿದ್ದು ಸರಿಯಲ್ಲ. ಯಾರೇ ಆಗಲಿ, ಸಾರ್ವಜನಿಕ ಪ್ರದೇಶದಲ್ಲಿ ಕಿತ್ತಾಟ ನಡೆಸುವಂತೆಯೇ ಇಲ್ಲ. ಸಂಬಂಧಿಕರೇ ಆಗಿದ್ದರೂ ಗಂಡ ಪತ್ನಿಗೆ, ಮಕ್ಕಳಿಗೆ ಅಥವಾ ತಾಯಿಗೆ ಆದರೂ ಹೊಡೆಯುವುದು, ಬೈಯುವುದು ಮಾಡುವಂತಿಲ್ಲ. ಈ ಪ್ರಕರಣದಲ್ಲಿ ಮಗಳೇ ರಾಕ್ಷಸಿ ಪ್ರವೃತ್ತಿ ತೋರಿದ್ದು ಉತ್ತರ ಕರ್ನಾಟಕ ಭಾಗದ ವರ್ತನೆಯನ್ನು ಮಂಗಳೂರಿನಲ್ಲಿ ತೋರಿಸಿದ್ದಲ್ಲದೆ, ಅದು ವಿಡಿಯೋ ರೂಪದಲ್ಲಿ ಹಂಚಿಕೆಯಾಗಿ ಇಲ್ಲಿನ ಜನರ ಮಾನ ಹರಾಜಾಗುವಂತೆ ಮಾಡಿದೆ.

ಪೊಲೀಸರು ತಾಯಿ-ಮಗಳ ಹಲ್ಲೆ ಘಟನೆ ಬಗ್ಗೆ ದೂರು ಬಂದಿಲ್ಲ ಎನ್ನುತ್ತಿದ್ದಾರೆ. ಸಾರ್ವಜನಿಕ ಪ್ರದೇಶದಲ್ಲಿ ಯಾರೇ ಗಲಾಟೆ ಮಾಡಿದರೂ, ಹಲ್ಲೆಗೈದರೂ ಪೊಲೀಸರು ಸುಮೊಟೋ ಕೇಸು ದಾಖಲಿಸಬಹುದು. ಆದರೆ ಅವರೂ ತಮಗ್ಯಾಕೆ ಉಸಾಬರಿ ಎಂದು ಸುಮ್ಮನಿದ್ದಾರೆ. ವಿಡಿಯೋ ಮಾಡಿ ಹಂಚಿದವರ ವಿರುದ್ಧ ಕ್ರಮ ಕೈಗೊಳ್ತೀವಿ ಎನ್ನುತ್ತಿದ್ದಾರೆ. ವಿಡಿಯೋ ಮಾಡಿದ್ದರಿಂದ ಅಮಾನುಷ ಘಟನೆ ಬಯಲಿಗೆ ಬಂದಿದ್ದು ಮಗಳ ರಾಕ್ಷಸಿ ವೃತ್ತಿಯನ್ನು ಜಗತ್ತಿಗೆ ತೋರಿಸಿದೆ. ಆದರೆ ಇಲ್ಲಿ ಪ್ರಶ್ನೆ ಬಂದಿರೋದು ವೃದ್ಧ ತಾಯಿಯನ್ನು ಪಂಚಾಯತ್ ಎದುರುಗಡೆಯೇ ನಡು ಬಿಸಿಲ ನಡುವೆ ನೆಲಕ್ಕೆ ದೂಡಿ ಹಲ್ಲೆ ಮಾಡುತ್ತಿದ್ದರೆ ಅಲ್ಲಿದ್ದ ಯಾರು ಕೂಡ ಪ್ರಶ್ನೆ ಮಾಡಿಲ್ಲ, ತಡೆಯಲು ಹೋಗಿಲ್ಲ ಅನ್ನುವುದು. ಈ ಕಾರಣದಿಂದಾಗಿ ಮನುಷ್ಯ ಮಾನವೀಯತೆಯನ್ನೇ ಮರೆತು ಹೋಗುತ್ತಿದ್ದಾನೆಯೇ ಎಂಬ ಪ್ರಶ್ನೆ ಮೂಡುವಂತಾಗಿದೆ.

A Daughter beats her elderly mother in broad daylight outside #Moodushedde Panchayat in #Mangalore. But the bigger tragedy? People stood around, watched, filmed… and did NOTHING. If we can’t protect a helpless mother, what humanity do we have left ?#Mangaluru #HumanityDies pic.twitter.com/eVeaM5RvCJ

— Headline Karnataka (@hknewsonline) November 29, 2025

A disturbing incident near the Moodushedde Gram Panchayat office on the outskirts of Mangaluru has raised serious questions about fading human values. A video of a woman brutally pushing her elderly mother to the ground and hitting her with a slipper has gone viral. What has shocked people even more is the behavior of the bystanders, who remained silent spectators.