ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸುಮಾರು ಒಂದು ವರ್ಷದಿಂದ ತಡೆ ಹಿಡಿದಿದ್ದ ಭಾರತ-ಅಮೆರಿಕ ವ್ಯಾಪಾರ ಒಪ್ಪಂದ ಕೊನೆಗೂ ಸಾಕಾರಗೊಂಡಿದೆ. ಕಳೆದ ಸೋಮವಾರ ರಾತ್ರಿ ಡೊನಾಲ್ಡ್ ಟ್ರಂಪ್ ನಮ್ಮ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಕರೆ ಮಾಡಿ ಈ ಒಪ್ಪಂದ ಏರ್ಪಟ್ಟಿದ್ದಕ್ಕೆ ಅಭಿನಂದನೆ ಸಲ್ಲಿಸಿದ್ದರು. ಈ ಒಪ್ಪಂದದ ಸುದ್ದಿಯನ್ನು ಮೊದಲು ಅಧಿಕೃತವಾಗಿ ಘೋಷಣೆ ಮಾಡಿದ ಟ್ರಂಪ್ ಆಡಳಿತ, ಭಾರತದಿಂದ ಅಮೆರಿಕಕ್ಕೆ ರಫ್ತಾಗುವ ಉತ್ಪಾದನೆಗಳ ಮೇಲೆ ವಿಧಿಸಲಾಗಿದ್ದ ಶೇ.25 ಸುಂಕ(ಟ್ಯಾರಿಫ್) ವನ್ನು ಶೇ.18ಕ್ಕೆ ಇಳಿಸಿರುವುದಾಗಿಯೂ ತಿಳಿಸಿತ್ತು. ಈ ವ್ಯಾಪಾರ ಒಪ್ಪಂದ ಆಡಳಿತಾರೂಢ ಬಿಜೆಪಿ ಮತ್ತು ಮಿತ್ರ ಪಕ್ಷಗಳಲ್ಲಿ ವಿದ್ಯುತ್ ಸಂಚಾರಕ್ಕೆ ಕಾರಣವಾಗಿದೆ. 

‘ಇದೊಂದು ಐತಿಹಾಸಿಕ ವ್ಯಾಪಾರ ಒಪ್ಪಂದ, ಈ ಒಪ್ಪಂದದ ಕುರಿತು ಇಡೀ ದೇಶದ ಜನರಲ್ಲಿ ಉತ್ಸಾಹ, ಸಂಭ್ರಮದ ವಾತಾವರಣವಿದೆ’ ಎಂದು ಮೋದಿ ಸರ್ಕಾರದ ಮಂತ್ರಿಗಳು, ಭಾರತೀಯ ಜನತಾ ಪಾರ್ಟಿ ಮತ್ತು ಮಿತ್ರಪಕ್ಷಗಳು ಕೊಂಡಾಡುತ್ತಿವೆ. ‘ಪ್ರಧಾನಿ ನರೇಂದ್ರ ಮೋದಿ ಅವರ ದೂರದೃಷ್ಟಿ ಮತ್ತು ಧೃಡ ನಿಶ್ಚಯದ ನಾಯಕತ್ವದಿಂದಾಗಿ ಈ ಒಪ್ಪಂದ ಸಾಧ್ಯವಾಗಿದೆ’ ಎಂದು ಮುಕ್ತ ಕಂಠದಿಂದ ಶ್ಲಾಘಿಸುತ್ತಿರುವ ಎನ್‌ಡಿಎ ಪಕ್ಷಗಳು, ಮಂಗಳವಾರ ನಡೆದ ಮೈತ್ರಿಕೂಟದ ಸಂಸದರ ಸಭೆಯಲ್ಲಿ ಭಾರಿ ಗಾತ್ರದ ಹೂವಿನ ಹಾರ ಪ್ರಧಾನಿ ಕೊರಳಿಗೆ ಹಾಕಿ ಸನ್ಮಾನವನ್ನೂ ಮಾಡಿದ್ದಾರೆ. ಈ ಒಪ್ಪಂದದ ಸಂಪೂರ್ಣ ವಿವರಗಳನ್ನು ದೇಶದ ಜನರಿಗೆ ತಿಳಿಸುವುದಕ್ಕೆ ಆಸಕ್ತಿ ತೋರದ ಭಾರತ ಸರ್ಕಾರ, ಅಮೆರಿಕಕ್ಕೆ ರಫ್ತಾಗುವ ಭಾರತದ ವಸ್ತುಗಳ ಮೇಲಿನ ಸುಂಕ ಶೇ.7ರಷ್ಟು ಕಡಿಮೆ ಆಗಿರುವುದನ್ನು ಮಾತ್ರ ಒತ್ತಿ ಒತ್ತಿ ಹೇಳುತ್ತಿದೆ. ಭಾರತದ ಮೇಲಿನ ಸುಂಕ ಕಡಿತವಾಗಿದ್ದರ ಹೊರತಾಗಿ ಈ ವ್ಯಾಪಾರ ಒಪ್ಪಂದದಲ್ಲಿರುವ ಮುಖ್ಯ ಅಂಶಗಳೇನು? ಆ ಎಲ್ಲ ಅಂಶಗಳು ಭಾರತದ ಹಿತಕ್ಕೆ ಪೂರಕವೋ ಮಾರಕವೋ? ವರ್ಷದಿಂದ ನೆನೆಗುದಿಗೆ ಬಿದ್ದಿದ್ದ ಈ ಒಪ್ಪಂದ ಈಗ ಸಾಧ್ಯವಾಗಿದ್ದಕ್ಕೆ ಕಾರಣಗಳೇನು? ಹಲವು ತಿಂಗಳುಗಳಿಂದ ಕಗ್ಗಂಟಾಗಿದ್ದ ಭಾರತ-ಅಮೆರಿಕ ನಡುವಿನ ದ್ವಿಪಕ್ಷೀಯ ಸಂಬಂಧಲ್ಲಿ ಈಗ ಅಂಥ ಮಹತ್ವದ ಬದಲಾವಣೆ ಆಗಿರುವುದಾದರೂ ಏನು? ಎಂಬ ಬಗ್ಗೆಯೂ ದೇಶದಲ್ಲಿ ವ್ಯಾಪಕ ಚರ್ಚೆ ನಡೆದಿದೆ. 

ದೇಶಕ್ಕೆ ಪೂರಕವೋ ಮಾರಕವೋ? 

ಒಪ್ಪಂದದ ವಿವರಗಳ ಬಗೆಗೆ ಭಾರತ ಸರ್ಕಾರ ಹೆಚ್ಚು ಹೇಳದಿದ್ದರೂ ಅಮೆರಿಕದ ಅಧಿಕಾರಿಗಳು ನೀಡುತ್ತಿರುವ ಹೇಳಿಕೆಗಳಿಂದ ಒಪ್ಪಂದದ ಎಲ್ಲ ವಿವರಗಳೂ ಭಾರತೀಯರಿಗೆ ಈಗ ಗೊತ್ತಾಗಿವೆ.  ವಿವರಗಳನ್ನು ನೋಡಿದಾಗ ಈ ಒಪ್ಪಂದ ಭಾರತದ ಹಿತಕ್ಕೆ ಪೂರಕವೋ ಅಥವಾ ಮಾರಕವೋ? ಇಂಥದೊಂದು ಒಪ್ಪಂದ ಮಾಡಿಕೊಳ್ಳಬೇಕಾದ ಅನಿವಾರ್ಯತೆ ಏನಿತ್ತು? ಡೊನಾಲ್ಡ್ ಟ್ರಂಪ್ ಸರ್ಕಾರದ ಒತ್ತಡಗಳಿಗೆ ಭಾರತ ಮಣಿಯಿತೇ? ಎಂಬ ಪ್ರಶ್ನೆಗಳು ಸಹಜವಾಗಿ ಎದ್ದಿವೆ. ಅಮೆರಿಕ ಸರ್ಕಾರದ ವ್ಯಾಪಾರ ಪ್ರತಿನಿಧಿ ಜೆಮಿಸನ್ ಗ್ರೀಯರ್ ಪ್ರಕಾರ, ‘ಭಾರತದ ವಸ್ತುಗಳ ಮೇಲಿನ ಸುಂಕವನ್ನು ಅಮೆರಿಕ ಶೇ.18ಕ್ಕೆ ಇಳಿಸಿದೆ. ಆದರೆ, ಅಮೆರಿಕದ ವಸ್ತುಗಳ ಮೇಲೆ ಭಾರತದಲ್ಲಿ ಯಾವುದೇ ಶುಲ್ಕವಿರುವುದಿಲ್ಲ. ಈ ಹಿಂದೆ ಅಮೆರಿಕದಿಂದ ಭಾರತಕ್ಕೆ ಬರುವ ವಸ್ತುಗಳ ಮೇಲೆ ಶೇ.13.5ರಷ್ಟಿದ್ದ ಸುಂಕವನ್ನು ಈಗ ಶೂನ್ಯಕ್ಕೆ ಇಳಿಸಲು ಭಾರತ ಸಹಮತ ವ್ಯಕ್ತಪಡಿಸಿದೆ. ಅಷ್ಟೇ ಅಲ್ಲ, ಐದು ನೂರು ಶತಕೋಟಿ ಡಾಲರ್ ಅಂದರೆ ಸುಮಾರು ನಲವತ್ತೈದು ಲಕ್ಷ ಕೋಟಿ ರೂಪಾಯಿ ಮೊತ್ತದ ಅಮೆರಿಕದ ವಸ್ತುಗಳು ಭಾರತದ ಮಾರುಕಟ್ಟೆಗೆ ಪ್ರವೇಶಿಸುವುದಕ್ಕೂ ಮೋದಿ ಸರ್ಕಾರ ಹಸಿರು ನಿಶಾನೆ ತೋರಿದೆ. ಇಂಧನ, ತಂತ್ರಜ್ಞಾನ, ಕಲ್ಲಿದ್ದಲು ಮತ್ತು ಕೃಷಿ ಉತ್ಪನ್ನಗಳು ಇದರಲ್ಲಿ ಪ್ರಮುಖವಾಗಿರುತ್ತವೆ. ಹೈನುಗಾರಿಕೆ, ಅಕ್ಕಿ, ಬೀಫ್, ಸೋಯಾಬಿನ್ ಮತ್ತು ಸಕ್ಕರೆಗಳ ಆಮದು ಮೇಲೆ ಮಾತ್ರ ಅಲ್ಪ ಪ್ರಮಾಣದ ಶುಲ್ಕವಿರುತ್ತದೆ ಎಂದು ಗ್ರೀಯರ್ ವಿವರಿಸಿದ್ದಾರೆ. 

'ಕೃಷಿ ಕ್ಷೇತ್ರವನ್ನೂ ವ್ಯಾಪಾರ ಒಪ್ಪಂದದ ವ್ಯಾಪ್ತಿಗೆ ಸೇರಿಸಬೇಕು ಎಂದು ಡೊನಾಲ್ಡ್ ಟ್ರಂಪ್ ಒತ್ತಡ ಹೇರುತ್ತಿದ್ದಾರೆ. ಆದರೆ, ಭಾರತೀಯ ಕೃಷಿ ಕ್ಷೇತ್ರಕ್ಕೆ ಮಾರಕವಾಗಲಿರುವ ಇಂಥ ಒಪ್ಪಂದಕ್ಕೆ ಭಾರತ ಸಿದ್ಧವಿಲ್ಲ, ಅದೇ ಕಾರಣಕ್ಕೆ ಒಪ್ಪಂದಕ್ಕೆ ಸಹಿ ಹಾಕುವುದು ವಿಳಂಬವಾಗಿದೆ’ ಎಂದೇ ಮೋದಿ ಸರ್ಕಾರ ಇಲ್ಲಿಯವರೆಗೆ ಹೇಳುತ್ತ ಬಂದಿದೆ. ಈಗ ಧಿಡೀರ್‌ನೇ ಭಾರತದ ಕೃಷಿ ಕ್ಷೇತ್ರವನ್ನೂ ಅಮೆರಿಕಕ್ಕೆ ಮುಕ್ತಗೊಳಿಸುವಂಥ ನಿರ್ಧಾರ ಕೈಗೊಂಡಿದೆ. ಈ ಬದಲಾವಣೆಗೆ ಕಾರಣಗಳೇನು? ಎಂಬುದು ತಿಳಿಯದಾಗಿದೆ. ‘ಮೋದಿ ಸರ್ಕಾರ ಸಂಪೂರ್ಣವಾಗಿ ಟ್ರಂಪ್ ಆಡಳಿತಕ್ಕೆ ಶರಣಾಗಿದೆ’ ಎಂಬ ಆರೋಪಗಳು ಕೇಳಿಬರುತ್ತಿವೆ. 

ಟ್ರಂಪ್ ಷರತ್ತುಗಳಿಗೆಲ್ಲ ಒಪ್ಪಿಗೆ, ಲಾಭ ಯಾರಿಗೆ ?  

ಈ ಸುಂಕ ಸಮರ ಆರಂಭವಾಗುವುದಕ್ಕಿಂತ ಪೂರ್ವದಲ್ಲಿ ಭಾರತದ ಉತ್ಪನ್ನಗಳ ಮೇಲೆ ಅಮೆರಿಕದ ಸುಂಕ ಶೇ.3.25ರಷ್ಟಿತ್ತು, ಈಗ ಅದು ಶೇ.18ರಷ್ಟು ಹೆಚ್ಚಾಗಿದೆ. ಅಮೆರಿಕದ ಉತ್ಪನ್ನಗಳ ಮೇಲೆ ಭಾರತ ಶೇ.13.5ರಷ್ಟು ಸುಂಕ ವಿಧಿಸುತ್ತಿತ್ತು, ಈಗ ಅದನ್ನು ಶೂನ್ಯಕ್ಕೆ ಇಳಿಸಲಾಗಿದೆ. ಈ ಒಪ್ಪಂದದಿಂದ ನಿಜಕ್ಕೂ ಲಾಭವಾಗಿರುವುದು ಯಾರಿಗೆ? ಎಂಬುದನ್ನು ಸರ್ಕಾರ ಉತ್ತರಿಸಬೇಕಾಗಿದೆ. ಕೆಲ ತಿಂಗಳುಗಳ ಹಿಂದಷ್ಟೇ ಶೇ.50ಕ್ಕೆ ಏರಿಸಲಾಗಿದ್ದ ಸುಂಕವನ್ನು ಅಮೆರಿಕ ಈಗ ಶೇ.18ಕ್ಕೆ ಇಳಿಸಿದೆ ಎಂದು ಸಂಭ್ರಮಿಸಬೇಕೋ ಅಥವಾ ಸುಂಕ ಸಮರಕ್ಕಿಂತ ಮೊದಲು ಶೇ.3.25 ರಷ್ಟಿದ್ದ ಸುಂಕ ಈಗ ಆರು ಪಟ್ಟು ಹೆಚ್ಚಾಗಿ ಶೇ.18ಕ್ಕೇರಿದೆ, ಇದು ಭಾರತಕ್ಕಾದ ಹಿನ್ನಡೆ ಎಂದು ಈ ಒಪ್ಪಂದವನ್ನು ಅರ್ಥೈಸಬೇಕೋ ಎಂಬುದು ಚರ್ಚಾರ್ಹ ವಿಷಯ. ಅಮೆರಿಕ- ಭಾರತಗಳ ಮಧ್ಯೆ 2024-25ರ ಸಾಲಿನಲ್ಲಿ ನಡೆದಿರುವ ವಾಣಿಜ್ಯ ಚಟುವಟಿಕೆಗಳ ಅಂಕಿ ಅಂಶಗಳನ್ನು ಗಮನಿಸಿದರೆ ಎಲ್ಲವೂ ಸ್ಪಷ್ಟವಾಗುತ್ತದೆ. 

2024-25ರಲ್ಲಿ ಭಾರತ ಅಮೆರಿಕಕ್ಕೆ 6,41,000 ಕೋಟಿ ರೂಪಾಯಿ ಮೊತ್ತದ ವಸ್ತುಗಳನ್ನು ರಫ್ತು ಮಾಡುತ್ತಿತ್ತು. ಬದಲಾಗಿ, ಭಾರತಕ್ಕೆ ಅಮೆರಿಕದಿಂದ ಆಮದಾಗುವ ವಸ್ತುಗಳ ಮೊತ್ತವು 3,39,000 ಕೋಟಿ ಮಾತ್ರವಾಗಿತ್ತು. ಅಂದರೆ, ಅಮೆರಿಕದ ಜೊತೆಗಿನ ವಾಣಿಜ್ಯ ವಹಿವಾಟಿನಲ್ಲಿ ಭಾರತದ್ದೇ ಮೇಲುಗೈ ಆಗಿತ್ತು. ಆದರೆ, ಈಗ ಸುಮಾರು 45 ಲಕ್ಷ ಕೋಟಿ ರೂಪಾಯಿ ಮೊತ್ತದ ಉತ್ಪನ್ನಗಳು ಭಾರತದ ಮಾರುಕಟ್ಟೆ ಪ್ರವೇಶಕ್ಕೆ ಒಪ್ಪಿಗೆ ನೀಡಿರುವುದರಿಂದ ಪರಿಸ್ಥಿತಿ ಏನಾಗಬಹುದು ಎಂದು ಊಹಿಸಬಹುದಾಗಿದೆ. ಇದು ಐದು ವರ್ಷಗಳ ಒಪ್ಪಂದವೆಂದು ಪರಿಗಣಿಸಿದರೂ ಪ್ರತಿವರ್ಷ ಭಾರತಕ್ಕೆ ಸುಮಾರು ಒಂಬತ್ತು ಲಕ್ಷ ಕೋಟಿ ರೂಪಾಯಿ ಮೊತ್ತದ ಅಮೆರಿಕದ ಉತ್ಪನ್ನಗಳು ಯಾವುದೇ ಸುಂಕವಿಲ್ಲದೇ ಪ್ರವೇಶ ಮಾಡಲಿವೆ. 2024-25ರ ಸಾಲಿನಲ್ಲಿ ಕೇವಲ 3,39,000 ಲಕ್ಷ ಕೋಟಿಯಷ್ಟಿದ್ದ ಆಮದಿನ ಪ್ರಮಾಣ ಇನ್ಮುಂದೆ ವಾರ್ಷಿಕವಾಗಿ ಕನಿಷ್ಠ ರೂ.9 ಲಕ್ಷ ಕೋಟಿಗೆ ಏರಲಿದೆ. ಇದು ಕೃಷಿ, ಉದ್ಯಮ ಸೇರಿದಂತೆ ಭಾರತದ ಉಳಿದೆಲ್ಲ ಕ್ಷೇತ್ರಗಳ ಬೆಳವಣಿಗೆಗೂ ಘಾತಕವಾಗಲಿದೆ ಎಂಬ ವಿಶ್ಲೇಷಣೆಗಳಿವೆ. 

ರಷ್ಯಾದಿಂದ ಕಡಿಮೆ ಬೆಲೆಗೆ ಕಚ್ಚಾ ತೈಲ ಖರೀದಿ ಮಾಡಿ ವರ್ಷಕ್ಕೆ ಕನಿಷ್ಠ 45 ರಿಂದ 47 ಸಾವಿರ ಕೋಟಿ ರೂಪಾಯಿ ಉಳಿತಾಯ ಮಾಡುತ್ತಿದ್ದ ಭಾರತ ಅಮೆರಿಕದ ಒತ್ತಡಕ್ಕೆ ಮಣಿದು ಈಗ ರಷ್ಯಾ ಬದಲಿಗೆ ಅಮೆರಿಕ ಮತ್ತು ವೆನಿಜುಯೆಲಾದಿಂದ ಕಚ್ಚಾ ತೈಲ ಖರೀದಿ ಮಾಡಲು ಒಪ್ಪಿಕೊಂಡಿದೆ, ಟ್ರಂಪ್ ಒತ್ತಡಕ್ಕೆ ಮಣಿದು ಇರಾನ್ ಜೊತೆ ಜಂಟಿಯಾಗಿ ಆ ದೇಶದ ಚಾಬಹಾರ್ ಎಂಬಲ್ಲಿ ನಿರ್ಮಿಸುತ್ತಿದ್ದ ಬಂದರು ಪ್ರಾಜೆಕ್ಟ್‌ನಿಂದಲೂ ಹಿಂದೆ ಸರಿದಿದೆ. ರಷ್ಯಾ ಮತ್ತು ಇರಾನ್‌ನಂಥ ಹಳೆಯ ಹಾಗೂ ನಂಬಿಕೆಯ ಮಿತ್ರ ರಾಷ್ಟ್ರಗಳನ್ನು ಬಿಟ್ಟು ದೇಶದ ಹಿತಕ್ಕೆ ಮಾರಕವಾಗುವಂಥ ಒಪ್ಪಂದವನ್ನು ಅಮೆರಿಕದೊಂದಿಗೆ ಮಾಡಿಕೊಳ್ಳಲೇಬೇಕಾದ ಅನಿವಾರ್ಯತೆಗೆ ಭಾರತ ಸಿಲುಕಿದ್ದು ಏಕೆ ಎಂಬುದು ಯಕ್ಷಪ್ರಶ್ನೆ.

The long-pending India–US trade agreement, which had reportedly been stalled for nearly a year under US President Donald Trump, has finally materialized. On Monday night, Trump personally called Prime Minister Narendra Modi to congratulate him on the agreement. The Trump administration was the first to officially announce the deal, stating that tariffs on Indian exports to the US would be reduced from 25% to 18%.